పాదం

||పాదం||
నన్ను చేర్చుకోని గ్రహంవైపు పరుగుదీసి
సమస్తాన్ని సైతం కలం చేసి
అక్షరాల్లా జీవిస్తుంటా
ఎవరూ లేని ఆ అనాథ మట్టిలో బూజుపట్టిన ఓ ఆధారాన్ని వెతుక్కుని
నా రెండువేళ్ళ మధ్య సిగరెట్ పీక రాసే
పొగ కవిత్వాన్ని అనువదిస్తూ సాగిపోతాను
తెల్లటి పొగ నడువంపులు
నా కవాటాల్లో చేరి ఉక్కిరిబిక్కిరి చేసి
కవిత్వాన్ని రాయిస్తుంటాయి మరి
అక్కడో సాలీడు అల్లిన గూడు నా కాగితంలో కడతాను
కానీ గూడులో చిక్కుకున్న చీమ ఆర్తనాథాలను కాగితంపై అంటించలేను
బాధను స్వీకరించలేని మనిషిని కద
రెండు సిరా చుక్కల్లో చూస్కోనే నా పిచ్చి ఆనందాన్ని
ఆ ప్రాణి లో చూడలేనందుకు
రాల్చిన అశ్రుక్షణాలెన్నో
నా మది పాదాలు కదిలాయి ఇంకో గ్రహం వైపు
కలం కదలిక అక్కడితో ఆపేసి
కాగితాన్ని విసిరేసి

14/7/15