ప్రేమను పరిచయం చేసేది కుటుంబం
ప్రపంచాన్ని పరిచయం చేసేది స్నేహం
ఇలా అనిపిస్తుంటుంది మరి
ప్రకృతి పంచే ఈ అవ్యాజమైన బంధాన్ని
గుప్పెట్లో దాయలేక కొంత స్నేహన్ని
ఇంకొంతమందికి పంచుతూ సాగిపోతుంటాను
ప్రతీ అణువులో స్నేహం చిగురించడం నాకు ఓ వింతగానే అనిపించేది..
నాకు నేర్పిస్తున్న పుస్తకం
నన్ను నడిపిస్తున్న దారి
గలగల గుసగుసలాడే చెరువు
పక్కనే నన్ను స్పర్శించాలనుకునే గట్టు
నను శృతి చేసే గాలికెరటాల గమకాలు
పైన చెట్టుకి కాసిన సూరీడు
కింద మట్టితో మాటాడుతున్న నేరేడు
ఆకాశానికి అందాన్ని అద్దుతున్న కొంగలమాల
నా చేతిలో సడి చేయలేని రాయి
ఇలా పరిచయం లేని స్నేహలు
ఎన్నో అనుభూతుల్ని పలకరింపజేసాయి
నాకిప్పటికి గుర్తు
నాతో ఆడుకున్న ఉడుత
కొన్ని క్షణాల స్నేహన్నిచ్చి వెళ్ళిపొయింది
ఆ ఙ్ఞాపకాలు ఇప్పటికి గిచ్చుతూనే ఉంటాయి..
నేను రోజు చూసే అద్దం
కొంత నిశ్శబ్దం
నను నడిపించే కలం
నాతో ప్రతినిత్యం స్నేహిస్తుంటాయి..
ఇంకొంత స్నేహం కావాలి నాకు
2/8/15
No comments:
Post a Comment