మాసిన బాల్యం

|| మాసిన బాల్యం ||
కొన్ని చిట్లిన బాల్యాలు
మసి పూసుకున్న మనసులు మధ్య
"అరెయ్ చోటూ" అని పిలవబడుతుంటాయి
కాఫీకప్పుకి
చెత్త కుప్పకి
ట్రాఫిక్ సిగ్నల్ కి వేలాడుతూ
అలసిన నవ్వుల్ని ఎండిన డొక్కల్లో దాచేసుకుంటూ
పేవ్మెంట్ల పై పెరిగే పసితనాలు
మనిషితనం మరచిన మసితనాల మధ్య చితిమంటలై చివరాఖరికి వెలుగుతారు
నలిపివేయబడ్డ కాగితపు బతుకులు
మనుషులు విసిరిన విస్తరి మెతుకులు
వీళ్ళ జీవితాల్ని అద్దం పడతాయి
వీళ్ళ బాల్యాన్ని ప్రపంచపు 70mm స్క్రీన్ పై తీరుబడిగా చూసే మోర్ఫింగ్ మానవత్వాలెన్నో
మానవత్వాన్ని మన ముందు ముఖాల్లో వెతుక్కోవడమే మానవత్వం అనుకుంటూ
బతికేస్తున్నా సమాజమా
నీకో సలాం

12/7/15